మూర్ఖత్వం.. వాగులో కారు గల్లంతు

నంగునూరు మండలం అక్కెనపల్లి శివారులోని వాగులో శుక్రవారం రాత్రి ఓ కారు వాగులో కొట్టుకుపోయింది. అక్కెనపల్లి-బస్వాపూర్ మార్గంలో పెద్దవాగుపై ఉన్న కాజ్ వే వద్ద ఈ ఘటన జరిగింది. భారీవర్షాల కారణంగా.. కాజ్ వే పై వాగు ఉద్ధృతంగా ప్రవహిస్తుండటంతో.. రెండురోజులుగా ఆ మార్గంలో రాకపోకలు నిలిచిపోయాయి. అధికారులు, స్థానికులు ఆ మార్గంలో ఎవరూ వెళ్లకుండా ఓ ముళ్లకంపను అడ్డుపెట్టారు. గతరాత్రి పోరెడ్డిపల్లి నుంచి అప్పిసకాలనీ మీదుగా అక్కెనపల్లి మార్గంలో ఓ కారు వచ్చింది. కాజ్ వే పై ప్రవాహం ఎక్కువగా ఉందని అటు వెళ్లొద్దని స్థానికులు వారించినా వినలేదు.

కాజ్ వే పై నుంచి వెళ్లేందుకు ప్రయత్నించగా.. ఆ కారు వాగులో గల్లంతైంది. రాత్రివేళ కావడంతో కారుకోసం ఎంత వెతికినా కనిపించలేదు. విషయం తెలుసుకున్న రాజగోపాలపేట ఎస్ఐ రాజుగౌడ్ సిబ్బందితో కాజ్ వే వద్దకు వచ్చి ఆరా తీశారు. కారు ఆచూకీ కోసం ఇంకా గాలింపు చర్యలు కొనసాగుతున్నాయి.