కేటీఆర్ కుమారుడు హిమాన్షును పొగడ్తలతో ముంచేస్తున్నారే

మంత్రి కేటీఆర్ కుమారుడు హిమాన్షు పై సోషల్ మీడియాలో ప్రశంసల వర్షం కురుస్తూ ఉంది. హిమాన్షు ఓ ప్రభుత్వ ప్రాథమిక పాఠశాలను దత్తత తీసుకుని సుమారు రూ.కోటి వెచ్చించి కార్పొరేట్‌ స్కూల్ తరహాలో తీర్చిదిద్దడమే అందుకు కారణంగా. ప్రభుత్వ పాఠశాలకు సంబంధించిన ఫొటోలను ట్విట్టర్‌ వేదికగా షేర్‌ చేశాడు. హిమాన్షు ఖాజాగూడలోని ఓ ప్రైవేటు కార్పొరేట్‌ పాఠశాలలో చదివే సమయంలో గచ్చిబౌలి కేశవనగర్‌లో ఉన్న ప్రాథమిక పాఠశాలను సందర్శించాడు. పాఠశాలలోని విద్యార్థులతో షిమాన్షు మాట్లాడాడు. పేద విద్యార్థులు చదివే ఆ పాఠశాలను అభివృద్ధి చేయాలని నిర్ణయం తీసుకున్నాడు. పాఠశాలను దత్తత తీసుకోవాలని భావించాడు. పాఠశాల అభివృద్ధి కోసం సుమారు రూ.80 లక్షల నుంచి కోటి రూపాయల వరకు ఖర్చు చేసి అత్యాధునికంగా తీర్చిదిద్దాడని ఆ స్కూల్‌ హెడ్‌మాస్టర్‌ రాములు యాదవ్‌ వెల్లడించారు. హిమాన్షు సమకూర్చిన నిధులతో విద్యార్థులకు బెంచీలు, మరుగుదొడ్ల నిర్మాణం, డైనింగ్ గది, ఆట స్థలాన్ని ఏర్పాటు చేసినట్లు తెలిపారు. దీనికి సంబంధించిన వివరాలను హిమాన్షు ట్విట్టర్‌ వేదికగా షేర్‌ చేశారు. హిమాన్షు పుట్టినరోజు సందర్భంగా ఈ నెల 12న విద్యాశాఖ మంత్రి సబితా ఇంద్రారెడ్డి ఆ పాఠశాలను ప్రారంభించనున్నారు.