రైతు సంఘాల నేత రాకేష్ టికాయత్ పై దాడి

బెంగళూరు : సోమవారం నాడు కర్ణాటక రాజధాని బెంగళూరులో జరిగిన ఓ కార్యక్రమంలో రైతు నేతలు రాకేష్ టికాయత్, యుధ్వీర్ సింగ్‌లపై నలుపు రంగు సిరాను విసిరారు. కర్నాటకలో రైతు నాయకుడు కోడిహళ్లి చంద్రశేఖర్‌ ఓ ప్రాంతీయ ఛానల్‌ స్టింగ్‌ ఆపరేషన్‌ లో దొరికిపోయారు. ఆ వీడియోపై క్లారిటీ ఇస్తుండగా రైతు సంఘాల నేతలు రాకేష్ టికాయత్, యుధ్వీర్ సింగ్‌ లపై ఇంక్‌ విసిరారు. విలేకరుల సమావేశంలో కొంత మంది వాగ్వాదానికి దిగి వారిపై నల్ల ఇంకు విసిరి కుర్చీలు కూడా విసిరారు. రాకేష్ టికాయత్ మీడియాతో మాట్లాడుతూ ఈ ఘటనపై స్థానిక పోలీసులే బాధ్యత వహించాలని ఆరోపించారు. తమకు అసలు భద్రత లేదని, ఈ నిరసనలకు కర్ణాటక ప్రభుత్వం మద్దతు ఇచ్చిందని పేర్కొన్నారు. విలేకరుల సమావేశం జరుగుతూ ఉండగా.. ఒకరిపై ఒకరు కుర్చీలు విసురుకోవడంతో ఉద్రిక్త వాతావరణం నెలకొంది.