ఏపీలో స్వచ్ఛమైన రాజకీయం కావాలి

ఆంధ్రప్రదేశ్ లో అచ్చమైన, స్వచ్ఛమైన ప్రజారాజకీయం ప్రారంభం కావాలని బీఆర్ఎస్ అధినేత కేసీఆర్ అన్నారు. ఏపీలో మేం కర్తలం, భర్తలం అంటే కుదరదన్నారు. దేశంలో మార్పుకోసం ఏపీ కూడా భాగస్వామి కావాలన్నారు.అంతా మేమే చేయగలం అనే భావన విడనాడాలని ఆయన అభిప్రాయపడ్డారు. మంచికోసం జరిగే ప్రయత్నం తప్పకుండా విజయం సాధిస్తుందన్నారు. బీఆర్ఎస్ భవన్ లో కేసీఆర్ సమక్షంలో ఏపీ నేతలు చేరారు. కేసీఆర్ వారికి సాదరంగా పార్టీ కండువాలు కప్పి ఆహ్వానించారు. తోట చంద్రశేఖర్ తో పాటు మాజీ ఐఆర్ఎస్ అధికారి చింతల పార్థసారధి, మాజీ మంత్రి రావెల కిషోర్ , టీజే ప్రకాష్ తో పాటు పలువురు బీఆర్ఎస్ లో చేరారు. ఈ సందర్భంగా బీఆర్ఎస్ అధినేత కేసీఆర్ మాట్లాడారు. ఇప్పుడు వీరిపై ఒక పెద్ద బాధ్యతను పెట్టబోతున్నానని కేసీఆర్ అన్నారు. భారత్ లో 83 కోట్ల భూభాగంలో 41 కోట్ల ఎకరాల భూమి వ్యవసాయ యోగ్యమైనదని అన్నారు. వ్యవసాయం అద్భుతంగా సోలార్ విద్యుత్తు ద్వారా జరుపుకోవచ్చన్నారు. వాతావరణం కూడా ఇక్కడ వ్యవసాయానికి అనుకూలిస్తుందని కేసీఆర్ అన్నారు. యాపిల్ పండుతాయి. మామిడి పండ్లు మన దేశంలో వస్తాయన్నారు. ఏపీ బీఆర్ఎస్ అధ్యక్షుడిగా తోట చంద్రశేఖర్ ను నియమిస్తున్నానని కేసీఆర్ ప్రకటించారు.