Chandrababu : దేవుడి స్క్రిప్ట్ అలాగే రాశాడు.. అందుకే ఇంతటి విజయం

అమరావతి బ్రాండ్ దెబ్బతినేలా విషప్రచారం చేశారని, ఐదేళ్లుగా రాష్ట్రానికి తీరని అన్యాయం చేశారని ముఖ్యమంత్రి చంద్రబాబు అన్నారు. ఆయన మీడియా సమావేశంలో మాట్లాడుతూ రైతులంతా 1631 రోజులు ఆందోళన చేశారని, టీడీపీ ప్రభుత్వం అధికారంలోకి వచ్చాక ఆందోళన విరమించారన్నారు. సుదీర్ఘ పోరాటం చేసిన ఘనత రాజధాని రైతులకే దక్కుతుందన్న చంద్రబాబు రైతుల పోరాటం భావితరాలకు ఆదర్శంగా నిలిచిపోతుందన్నారు. ఏపీ అంటే అమరావతి, పోలవరం అని, ఐదు కోట్ల ప్రజానీకానికి దశ, దిశ నిర్దేశించే రాజధానిగా అమరావతిని రూపుదిద్దుతామని తెలిపారు. దక్షిణ భారతదేశంలో ఎక్కువ నీళ్లు ఉండే నది గోదావరి అని పోలవరం పూర్తి, నదుల అనుసంధానంతో ప్రతి ఎకరాకు నీళ్లిచే అవకాశం ఉందని తెలిపారు. రాష్ట్రానికి వరంగా మారాల్సిన పోలవరం.. శాపంగా మారిందన్న చంద్రబాబు ప్రజావేదిక కూల్చివేతతో గత ప్రభుత్వం పాలన ప్రారంభించిందన్నారు. ఐదేళ్లుగా వైసీపీ విధ్వంసం పాలన సాగించిందని, ఎక్కడికక్కడ మట్టి, ఇసుక దోచుకున్నారన్నారు.