Chandrababu : చంద్రబాబు కీలక నిర్ణయం తీసుకున్నారా? ఆ పోస్టులను భర్తీ చేయాలని అనుకోవడం లేదా?

అందిన సమాచారం మేరకు 2014 నుంచి 2019 వరకూ చంద్రబాబు నాయుడు ప్రభుత్వంలో సలహాదారులున్నారు. వివిధ శాఖలకు సంబంధించి ఆయన సలహాదారులను నియమించారు. ఇవి కేవలం పార్టీ నేతలకు ఏదో ఒక పదవి ఇవ్వడం కోసమే. నిజానికి సలహాదారులు ఇచ్చే సలహాలను ప్రభుత్వాలు ఏవీ తీసుకోవు. వారు నామమాత్రంగానే ఉంటారు. కాకుంటే పార్టీ కోసం కష్టపడిన వారికి రాజకీయ ఉపాధి కల్పించి సంతృప్తి పర్చేందుకే సలహాదారులను నియమించుకుంటూ వస్తున్నారు. నిజానికి ముఖ్యమంత్రి నుంచి మంత్రుల వరకూ ఐఏఎస్ లు ఉంటారు. వారి సహకారం, సలహాలు, సూచనలతో కొంత అవగాహన ఏర్పడుతుంది.

గత వైసీపీ ప్రభుత్వమయితే సలహాదారుల సంఖ్యను విచ్చలవిడిగా నియామకం చేపట్టింది. అవసరమున్నా లేకపోయినా ముఖ్యమంత్రి, ప్రభుత్వ సలహాదారులంటూ దాదాపు నలభై మందిని వైసీపీ ప్రభుత్వం నియమించుకుంది. వీరికి నెలకు లక్షల్లో వేతనం ఉంటుంది. అంటే పారితోషికంగా ఇస్తారు. ఇక వీరికి వసతులతో పాటు, వాహనం, కార్యాలయం వంటి ప్రత్యేక సౌకర్యాలను ఏర్పాటు చేస్తారు. దాదాపు నలభై మందిని గత ప్రభుత్వం సలహాదారులుగా నియమించుకోవడాన్ని నాడు హైకోర్టు కూడా తప్పుపట్టింది. సలహాదారులకు కల్పించినన్ని సౌకర్యాలు న్యాయమూర్తులకు కూడా లేవని నాడు హైకోర్టు వ్యాఖ్యానించడం పరిస్థితికి అద్దం పడుతుంది.

అందుకే ఈ నేపథ్యంలో చంద్రబాబు ఈసారి సలహాదారుల నియామకానికి దూరంగా ఉండాలని నిర్ణయించుకున్నట్లు తెలిసింది. కేవలం నామినేటెడ్ పోస్టులను మాత్రమే భర్తీ చేయనున్నారు. ప్రభుత్వ ఖజానాకు తూట్లు పొడిచే ఈ సలహాదారుల నియామకాన్ని కొంత కాలం పక్కన పెట్టాలని చంద్రబాబు నిర్ణయించినట్లు తెలిసింది. ఆర్థిక వ్యవస్థ గాడిలో పడేంత వరకూ సలహాదారుల నియామకం జోలికి వెళ్లకూడదని ముఖ్యమంత్రి చంద్రబాబు డిసైడ్ అయినట్లు చెబుతున్నారు. గత ప్రభుత్వంలో నియమించుకున్న సలహాదారులను వ్యతిరేకించిన తామే సంక్షేమ పథకాలను పక్కన పెట్టి సలహాదారులను నియమించుకుంటే తప్పుడు సంకేతాలు వెళతాయని చంద్రబాబు భావిస్తున్నారు. సో... సలహాదారుల నియామకం ఆంధ్రప్రదేశ్ లో ఇప్పట్లో లేనట్లేనన్నది అధికార వర్గాల నుంచి వినిపిస్తున్న మాట.