మోదీ - షా మధ్య విబేధాలు.. మంత్రి ఇంట్రెస్టింగ్ కామెంట్స్

ముఖ్యమంత్రి వైఎస్‌ జగన్‌మోహన్‌రెడ్డి నేతృత్వంలోని ఏపీ ప్రభుత్వం నాలుగేళ్లుగా అవినీతికి తావులేకుండా అభివృద్ధి, సంక్షేమమే ధ్యేయంగా ముందుకు సాగుతున్నదని ఉప ముఖ్యమంత్రి, దేవాదాయ శాఖ మంత్రి కొట్టు సత్యనారాయణ అన్నారు. ఏపీలోని వైఎస్ఆర్సీ ప్రభుత్వంపై కేంద్ర హోంమంత్రి అమిత్ షా లేవనెత్తిన అవినీతి ఆరోపణలను మంత్రి తోసిపుచ్చారు. బీజేపీలోని తెలుగుదేశం కోవర్టులు రాసిచ్చిన స్క్రిప్ట్‌ను అమిత్ షా చదువుతున్నారని మంత్రి అన్నారు. విశాఖలో అమిత్ షా, శ్రీకాళహస్తిలో నడ్డా వ్యాఖ్యలు చూస్తుంటే మోదీతో వారివురికి విభేదాలున్నట్లు అనిపిస్తోందన్నారు.

అమిత్ షా, ప్రధాని మోదీ మధ్య విభేదాలు ఉన్నందున సీఎం జగన్‌ను టార్గెట్ చేస్తూ అమిత్‌ షా మాట్లాడుతున్నారని, ఏపీకి సంబంధించి విశాఖపట్నంలో అమిత్ షా, కాళహస్తిలో జేపీ నడ్డా చేసిన వ్యాఖ్యలు అర్థరహితమని ఆయన అన్నారు. చంద్రబాబు.. అమిత్‌షాను బుట్టలో వేసుకున్నారని అన్నారు. మరోవైపు జగన్ మోహన్ రెడ్డికి వ్యతిరేకంగా ఒక్క మాట కూడా ప్రధాని మోదీ నోటి నుంచి రాలేదని, జగన్ మోహన్ రెడ్డి కూడా ప్రధానికి వ్యతిరేకంగా మాట్లాడలేదని, టీడీపీ అధినేత చంద్రబాబు.. ఢిల్లీ వెళ్లినప్పుడల్లా మోదీ అపాయింట్‌మెంట్ కూడా ఇవ్వలేదన్నది వాస్తవం అని సత్యనారాయణ అన్నారు. "పీఎం మోడీ, జగన్ మోహన్ రెడ్డి అభ్యర్థన మేరకు పోలవరం నిధులు రూ. 13,000 కోట్లు, రెవెన్యూ లోటు కేటాయింపు కింద మరో రూ. 10,000 కోట్లు విడుదల చేశారు. జగన్ మోహన్ రెడ్డిపై ఆయనకున్న ప్రత్యేక అభిమానం కారణంగా మోడీ ఆ డబ్బును విడుదల చేశారు." అని మంత్రి అన్నారు.

చంద్రబాబు పోలవరాన్ని ఏటీఎంగా వాడుకున్నారని మోదీ ఒకప్పుడు వ్యాఖ్యానించారని గుర్తు చేశారు. ప్రత్యేక హోదా, వైజాగ్ స్టీల్ ప్లాంట్ ప్రైవేటీకరణ రద్దు వంటి నిర్ణయాలు తీసుకుంటే ఆంధ్ర ప్రజలు సంతోషిస్తారని డిప్యూటీ సీఎం కొట్టు సత్యనారాయణ అన్నారు. పవన్ కళ్యాణ్ రాజకీయ ప్రచారాల కోసం వారాహి యాత్ర చేపడితే మాకు ఎలాంటి ఇబ్బంది లేదు.. కొందరు యువకులు మాత్రమే ఆయన వెంటే ఉంటారని, భక్తుల రూపంలో ఆలయానికి ఎవరు వచ్చినా ఎలాంటి ఆంక్షలు ఉండవని అన్నారు. ఆలయ పరిసరాల్లో రాజకీయ ప్రచారాలు చేయడం నిషిద్ధమని డిప్యూటీ సీఎం స్పష్టం చేశారు.