Rain Alert : అల్లాడిస్తున్న అల్పపీడనం.. ఎన్ని సార్లు దిశమార్చుకుని.. ఇక్కట్లు పాలు చేస్తుందంటే?

తమిళనాడు తీరంవైపు వెళుతుందని అంచనాలు వేస్తున్నా అది కదలడం లేదు. అల్పపీడనంగా బలపడి వాయుగుండంగా మారడం లేదు. అలాగని అల్పపీడనం కూడా బలహీనపడటం లేదు. ఇలాంటి పరిస్థితిని తాము ఎప్పుడూ చూడలేదని, చాలా అరుదుగా మాత్రమే ఇలాంటి ఘటనలు జరుగుతుంటాయని వాతావరణ శాఖ అధికారులు చెబుతున్నారు. గత పది రోజుల నుంచి ఈ అల్పపీడనం వాతావరణ శాఖ అధికారులను సయితం తికమక పెడుతుంది. ఏ దారి వెళుతుందో తెలియడం లేదు. ఎక్కడ తీరం దాటుతుంది? ఎప్పుడు బలహీన పడుతుందన్న అంచనాలకు అందకుండా ఈ అల్పపీడనం తన ప్రయాణాన్ని కొనసాగిస్తుందని వాతావరణ శాఖ అధికారులు చెబుతున్నారు.

అయితే ఈ అల్పపడీనం ప్రభావంతో ఉత్తరాంధ్రతో పాటు కోస్తాంధ్రలో భారీ వర్షాలు పడే అవకాశముందని మాత్రం చెబుతున్నారు. శ్రీకాకుళం, విజయనగరం, విశాఖపట్నం, నెల్లూరు జిల్లాలకు భారీ వర్షం కురుస్తుందని తెలిపారు. ఇప్పటికే కోస్తాంధ్రలో అనేక చోట్ల భారీ వర్షాలు కురుస్తున్నాయి. దీంతో ఉష్ణోగ్రతలు కూడా తతగ్గుముఖం పట్టాయి. ఈ ప్రభావంతో తెలుగు రాష్ట్రాలను చలి వణికిస్తోంది. చలి ప్రభావంతో ప్రజలు ఇళ్ల నుంచి బయటకు రావాలంటేనే భయపడుతున్నారు. రానున్న రెండు రోజుల్లో దీని తీవ్రత మరింత పెరిగే అవకాశముందని ఐఎండీ తెలిపింది. ఏపీలో సాధారణం కంటే 2 నుంచి 4 డిగ్రీల కనిష్ట ఉష్ణోగ్రతలు నమోదవుతున్నాయి. తెలంగాణలోని ఆసిఫాబాద్ జిల్లా సిర్పూర్‌లో 5.9 డిగ్రీలు, హైదరాబాద్‌లో 11.9 డిగ్రీల కనిష్ట ఉష్ణోగ్రత నమోదైంది. తెలంగాణలోనూ తేలికపాటి జల్లులు పడే అవకాశముందని తెలిపింది.