Tirumala : వడ్డీ కాసుల వాడి చెంతకు పోటెత్తిన భక్తజనం

ఈరోజు శనివారం కావడంతో ఎక్కువ మంది భక్తులు తిరుమలకు చేరుకున్నారని అధికారులు తెలిపారు. ఈరోజు తిరుమలలోని వైకుంఠం క్యూ కాంప్లెక్స్ లోనిన 31 కంపార్ట్‌మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లోకి ఉదయం ఏడు గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం పద్దెనిమిది గంటల సమయం పడుతుందని అధికారులు తెలిపారు. నిన్న తిరుమల శ్రీవారిని 66,256 మంది భక్తులు దర్శించుకున్నారు. వీరిలో 30,087 మంది భక్తులు తలనీలాలను సమర్పించుకుని తమ మొక్కులు చెల్లించుకున్నారని తిరుమల తిరుపతి దేవస్థానం అధికారులు వెల్లడించారు. నిన్న తిరుమల శ్రీవారి హుండీ ఆదాయం 3.54 కోట్ల రూపాయలు వచ్చిందని అధికారులు తెలిపారు. భక్తులు ఇబ్బంది పడకుండా టీటీడీ అధికారులు అన్ని చర్యలు తీసుకుంటున్నారు.