విషాదం.. కొడుకు ఆత్మహత్యను భరించలేక తండ్రి కూడా..

స్కూల్ నుంచి సస్పెండ్ చేయడంతో తీవ్రమనస్తాపానికి గురైన భాను ప్రకాష్ తన స్నేహితుడితో వీడియో కాల్ మాట్లాడుతూనే.. పురుగుల మందు తాగి ఆత్మహత్యకు యత్నించాడు. భానుప్రకాష్ పురుగుల మందు తాగి అపస్మారక స్థితిలో ఉండటాన్ని గమనించిన కుటుంబ సభ్యులు వెంటనే చికిత్స నిమిత్తం హైదరాబాద్ తరలించారు. ఆస్పత్రిలో చికిత్స పొందుతూ.. ఈ నెల 16వ తేదీన భాను మరణించాడు. స్వగ్రామానికి కుమారుడి మృతదేహాన్ని తీసుకెళ్లి అంత్యక్రియలు నిర్వహించారు తల్లిదండ్రులు. కొడుకు ఆత్మహత్యను భరించలేకపోయాడు తండ్రి రాంబాబు. శనివారం రాత్రి 11 గంటల సమయంలో ఇంటినుంచి బయటికి వెళ్లాడు. రాంబాబు ఎంతసేపటికీ తిరిగి రాకపోవడంతో అతనికోసం కుటుంబ సభ్యులు ఆ ప్రాంతమంతా వెతికినా ఎక్కడా కనిపించలేదు.

ఉదయం అయినా ఇంకా ఇంటికి రాలేదు. కంగారు పడిన కుటుంబ సభ్యులు మరోసారి ఊరంతా గాలించగా.. కుమారుడిని ఖననం చేసిన ప్రదేశానికి దగ్గర్లోనే ఉన్న ఒక చెట్టుకు ఉరికి వేలాడుతూ కనిపించాడు. ఇలా తండ్రి - కొడుకుల వరుస ఆత్మహత్యలతో గ్రామంలో విషాదఛాయలు అలుముకున్నాయి. పోలీసులు ఈ ఘటనపై కేసు నమోదు చేసుకుని దర్యాప్తు చేస్తున్నారు. పాఠశాల యాజమాన్యం భాను ప్రకాష్ ను సస్పెండ్ చేయడం వల్లే తన కొడుకు, ఆపై తన భర్త ఆత్మహత్యలు చేసుకున్నారని రాంబాబు భార్య ఆరోపించారు.