Rain Alert : హైదరాబాదీలకు వార్నింగ్.. ఈరోజు బయటకు వెళ్లకపోవడమే మంచిదట

కొన్ని జిల్లాల్లో మోస్తరు వర్షాలు, మరికొన్ని జిల్లాల్లో భారీ వర్షాలు కురుస్తాయని వాతావరణ శాఖ తెలిపింది. మంచిర్యాల, కొమురం భీం, ఆదిలాబాద్, సిరిసిల్ల, జగిత్యాల, కరీంనగర్, భూపాలపల్లి, వరంగల్ జిల్లాలో అతి భారీ వర్షాలు కురిసే అవకాశముందని వాతావరణ శాఖ తెలిపింది. ఇక మిగిలిన జిల్లాల్లో మోస్తరు వర్షాలు కురుస్తాయని తెలిపింది. తెలంగాణలోని తొమ్మిది జిల్లాలకు ఆరెంజ్ అలర్ట్ ను జారీ చేయగా, పదమూడు జిల్లాలకు ఎల్లో అలెర్ట్ ను వాతావరణ శాఖ జారీ చేసింది.

ఉరుములు, మెరుపులతో కూడిన వర్షమే కాకుండా గంటలకు నలభై నుంచి యాభై కిలోమీటర్ల వేగంతో ఈదురుగాలులు వీస్తాయని వాతావరణ శాఖ తెలిపింది. దీంతో గ్రేటర్ హైదరాబాద్ మున్సిపల్ కార్పొరేషన్ అధికారులు అప్రమత్తమయ్యారు. మ్యాన్ హోల్స్ మూతలు ఎవరూ తెరవకూడదని హెచ్చరించింది. ఇందుకోసం టోల్ ఫ్రీ నెంబరును ఏర్పాటు చేసింది. లోతట్టు ప్రాంతాల వారు అప్రమత్తంగా ఉండాలని, పురాతన భవనాల నుంచి నివాసాలను ఖాళీ చేయాలని కూడా సూచించింది.