సైరాలో ముందే కట్ చేసేశారు..!

సైరా నరసింహారెడ్డి సినిమా షూటింగ్ ఏడాదిన్నరగా జరుగుతూనే ఉంది. సురేందర్ రెడ్డి చెక్కిందే చెక్కుతున్నాడు. చిరు కూడా సైరా షూటింగ్ తో అలసిపోతున్నాడు. ఇక రామ్ చరణ్ కూడా డబ్బు నీళ్లలా ఖర్చు పెడుతూనే ఉన్నాడు. చారిత్రక నేపథ్యం ఉన్న సినిమా తియ్యడానికి చాలా సమయం పడుతుంది. మరి షూటింగ్ కే ఇంతకాలం వెచ్చిస్తే… పోస్ట్ ప్రొడక్షన్, సీజీ వర్క్ కి మరెంత సమయం పట్టాలి. అందుకే షూటింగ్ ని ఎంత వేగంగా అయితే అంత వేగంగా కంప్లీట్ చేసి పోస్ట్ ప్రొడక్షన్ పనులను చూడమని చెప్పాడట నిర్మాత రామ్ చరణ్. అయితే సీజీ, పోస్ట్ ప్రొడక్షన్ కి ఎక్కువ సమయం పడుతుంది కాబట్టి.. దానికి వీలైనంత సమయం కేటాయించాలంటే.. షూటింగ్ త్వరగా ముగించడం చాలా అవసరం.

ఒక పాట కూడా కట్…

అందుకే సైరా యూనిట్ సినిమాలో పెద్దగా ప్రాధాన్యం లేదు అనుకున్న సీన్స్ ని షూట్ చేయకముందే తీసేశారని టాక్ వినబడుతుంది. చాలా సీన్స్ ని ఎడిటింగ్ లో తీసెయ్యడం చూస్తుంటాం. కానీ సైరాలో మాత్రం షూటింగ్ జరగకుండానే స్క్రిప్ట్ దశలోనే ఎడిటింగ్ లో సీన్స్ లేపేస్తున్నారు. ఇక సినిమాలో ఐదు పాటలు ఉంటాలి. ఆ ఐదులో రెండు బ్యాగ్రౌండ్ స్కోర్ లో వస్తే.. మిగతా మూడు పాటల చిత్రకరణ జరగాల్సి ఉందట. కాని అందులో ఒక పాటని లేపేసి రెండు పాటల చిత్రీకరణే జరుపుతుందట యూనిట్. మరి ఈ రకంగా టైం సేవ్ అవడమే కాదు.. బడ్జెట్ కూడా కంట్రోల్ ఉంటుంది.