ఎక్కువమంది నెటిజన్లు.. న్యూ ఇయర్ వేడుకలు ఎక్కడ చేసుకోవాలనుకుంటున్నారో తెలుసా

ఆంక్షలు లేకపోయినా సరే.. నూతన సంవత్సర వేడుకలు తమ ఇళ్లలో.. కుటుంబ సభ్యులతో కలిసి చేసుకుంటామని చెబుతున్నారు నెటిజన్లు. లోకల్ సర్కిల్స్ అనే సోషల్ మీడియా ఫ్లాట్ ఫాం నిర్వహించిన సర్వేలో ఈ అభిప్రాయం వ్యక్తమైంది. ఈ సర్వేలో దేశంలో 132 జిల్లాలకు చెందిన 13 వేల మందికి పైగా స్త్రీ, పురుషులు పాల్గొన్నారు. 63 శాతం పురుషులు, 37 శాతం మహిళలు పాల్గొన్న ఈ సర్వేలో.. 2023 న్యూ ఇయర్ వేడుకలను ఎలా జరుపుకుంటున్నారని అడగ్గా.. 55 శాతం మంది కొత్త ఏడాదికి ఇంట్లోనే స్వాగతం పలుకుతామని చెప్పారట.

మరో 19 శాతం మంది తమకు న్యూ ఇయర్ వేడుకలు జరుపుకునే అలవాటు లేదని చెప్పగా.. ఈ ఏడాది కొత్త సంవత్సరం వేడుకలకు దూరంగా ఉండాలని నిర్ణయించుకున్నట్లు మరో 5 శాతం మంది నెటిజన్లు చెప్పారు. 2 శాతం మంది కుటుంబంతో కలిసి తమ ఏరియాలో జరిగే వేడుకల్లో పాల్గొంటామని, మరో 3 శాతం మంది ఫ్యామిలీ మొత్తం రెస్టారెంట్ కు వెళతామని పేర్కొన్నారు. అంటే మొత్తంమీద ప్రతి 10 మందిలో 8 మంది న్యూ ఇయర్ వేడుకలను తమ ఇళ్లలో జరుపుకునేందుకు ఇష్టపడుతున్నారు. లోకల్ సర్కిల్స్ సంస్థ ఈ వివరాలను శనివారం వెల్లడించింది.