మొదటి జాబితాను విడుదల చేసిన బీజేపీ.. ఎవరెవరికి అవకాశం దక్కిందంటే?

భారతీయ జనతా పార్టీ (బీజేపీ) రాబోయే లోక్‌సభ ఎన్నికలకు ప్రధాన మంత్రి నరేంద్ర మోదీ, కేంద్ర హోం మంత్రి అమిత్ షా సహా పలువురు అభ్యర్థులతో కూడిన మొదటి జాబితాను ప్రకటించింది. 2024 పార్లమెంట్ ఎన్నికల్లో పోటీ చేసే 195 మంది అభ్యర్థుల పేర్లను బీజేపీ నేత వినోద్ తావ్డే మీడియా సమావేశంలో ప్రకటించారు. అభ్యర్థుల తొలి జాబితాలో ఉత్తరప్రదేశ్‌లోని వారణాసి నుండి మరోసారి ప్రధాని నరేంద్ర మోదీ, గుజరాత్‌లోని గాంధీనగర్ నుంచి కేంద్ర హోంమంత్రి అమిత్ షా పోటీ చేయనున్నారు. తెలంగాణ నుంచి బీజేపీ తొమ్మిది మంది అభ్యర్థులను ప్రకటించింది. మల్కాజిగిరి నుంచి ఈటెల రాజేందర్, కరీంనగర్ నుంచి బండి సంజయ్, నిజామాబాద్ నుంచి డీ అరవింద్, జహీరాబాద్ నుంచి బీబీ పాటిల్, సికింద్రాబాద్ నుంచి జీ కిషన్ రెడ్డి, హైదరాబాద్ నుంచి డాక్టర్ మాధవి లత, చేవెళ్ల నుంచి కొండా విశ్వేశ్వర్ రెడ్డి, నాగర్ కర్నూల్ నుంచి పీ భరత్, భోంగీర్ నుండి నరసయ్యగౌడ్ పోటీ చేయనున్నారు.