మహిళల ఆసియా కప్ ను భారత్ సొంతం చేసుకుంది. మొదట బౌలింగ్ లో రాణించిన భారత్.. ఆ తర్వాత బ్యాటింగ్ లో కూడా ఎలాంటి టెన్షన్ లేకుండా విజయాన్ని అందుకుంది. మొదట బ్యాటింగ్ చేసిన శ్రీలంక ఏ దశలో కూడా భారత్ కు పోటీని ఇచ్చేలా కనిపించలేదు. పరుగులు చేయాలని అనుకున్నప్పుడల్లా శ్రీలంక బ్యాటర్లు వికెట్లను కోల్పోతూ వచ్చారు. ముఖ్యంగా రనౌట్ల కారణంగా శ్రీలంక కీలక వికెట్లను కోల్పోయింది. ఇంటర్నేషనల్ స్టార్ అయిన ఆటపట్టు 6 పరుగులు చేసి అవుట్ అవ్వడంతో శ్రీలంక శిబిరంలో ఆందోళన మొదలైంది. ఏ దశలో కూడా శ్రీలంక రన్ రేట్ మెరుగుపడలేదు. ముఖ్యంగా పేకమేడలా వికెట్ల పతనం సాగింది. 32 పరుగులకే 8 వికెట్లు కోల్పోయిన దశలో ఓ చిన్న భాగస్వామ్యం నమోదైంది. రణవీర 18 పరుగులతో టాప్ స్కోరర్ గా నిలవగా.. 13 పరుగులు రణసింఘే చేసింది. ఇక మిగిలిన బ్యాటర్లలో ఎవరూ డబుల్ డిజిట్ ను సాధించలేకపోయారు. భారత బౌలర్లలో రేణుక సింగ్ 3 మూడు వికెట్లు తీయగా.. గయక్వాడ్, స్నేహ్ రాణా చెరో రెండు వికెట్లు తీశారు.