ఎల్‌పీజీ గ్యాస్‌ కస్టమర్లకు ఉచిత రూ.50 లక్షల బీమా.. క్లెయిమ్ ఎలా చేసుకోవాలి

LPG Gas Insurance: గ్యాస్‌ సిలిండర్‌ కనెక్షన్‌ అందరికీ ఉంటుంది. అయితే కనెక్షన్‌ తీసుకున్నవారు కొన్ని విషయాలను తెలుసుకోవడం చాలా ముఖ్యం. దేశంలో అప్పుడప్పుడు గ్యాస్‌ సిలిండర్‌ ప్రమాదాలు జరగడం చూస్తుంటాము. సిలిండర్‌ పేలుడు కారణంగా ఎన్నో కుటుంబాలు బుగ్గిపాలవుతున్నాయి. కొన్ని సందర్భాల్లో ఆస్తినష్టంతో పాటు ప్రాణ నష్టం కూడా భారీగా జరుగుతుంటుంది. ఇలా ప్రమాదాలపై ఇన్సూరెన్స్‌ ఉంటుందనే విషయం మీకు తెలుసా? పెట్రోలియం కంపెనీలు తమ ఎల్‌పీజీ కస్టమర్లందరికీ ఉచిత ప్రమాద బీమా కవరేజీని అందిస్తాయి. కానీ ఈ విషయం వినియోగదారులకు ఎవ్వరు చెప్పరు. రూ.50 లక్షల ప్రమాద బీమా కవరేజీ ఉంటుంది. ఎల్‌పీజీ వినియోగదారులు దీని కోసం ప్రత్యేకంగా ప్రీమియం చెల్లించాల్సిన అవసరం లేదు. పెట్రోలియం కంపెనీ స్వయంగా ఈ కవరేజీని ఉచితంగా అందిస్తుంది.

ఎల్‌పీజీ సిలిండర్ పేలుడు ఘటన వల్ల జరిగిన నష్టానికి సంబంధించి ఎల్‌పీజీ వినియోగదారులు సంబంధిత పెట్రోలియం కంపెనీ నుండి పరిహారం పొందేందుకు అనుమతి ఉంటుంది. ఎల్‌పీజీ కస్టమర్‌లు, వారి కుటుంబ సభ్యులకు సంవత్సరానికి రూ.50 లక్షల వరకు మొత్తం పరిహారం లభిస్తుంది. ఒక కుటుంబంలోని ఒక సభ్యుడు రూ.10 లక్షల వరకు పరిహారం పొందే అవకాశం ఉంటుంది. ప్రమాదవశాత్తు గ్యాస్ లీకేజీ, పేలుడు మొదలైన వాటికి ఈ బీమా సౌకర్యం వర్తిస్తుంది. అందుకోసం వివిధ బీమా కంపెనీలతో పెట్రోలియం కంపెనీలు ఏర్పాట్లు చేసుకుంటాయి.

ఏ నష్టానికి ఎంత పరిహారం?

ఎల్‌పీజీ సిలిండర్ ప్రమాదం జరిగితే ఏదైనా ఆస్తి నష్టం జరిగితే గరిష్టంగా రూ.2 లక్షల వరకు క్లెయిమ్ చేసుకోవచ్చు. మరణించిన సందర్భంలో ఒక వ్యక్తి రూ. 6 లక్షల హామీ మొత్తాన్ని పొందుతారు. గాయం అయితే, ఒక వ్యక్తికి రూ. 2 లక్షల వరకు పరిహారం పొందవచ్చు.

బీమాను క్లెయిమ్ చేసుకోవడం ఎలా?

ప్రమాదం జరిగితే, దానిని సమీపంలోని పోలీస్ స్టేషన్‌కు, మీ LPG పంపిణీదారుకు నివేదించడం చాలా ముఖ్యం. ప్రమాదవశాత్తు గ్యాస్ పేలుడు విపత్తు సంభవించినప్పుడు బీమా కంపెనీని సంప్రదించాల్సిన అవసరం లేదు. అయితే, సమీపంలోని పోలీస్ స్టేషన్‌కు, ఎల్‌పిజి డిస్ట్రిబ్యూటర్‌కు సమాచారం అందించాలి. పోలీస్ స్టేషన్‌లో దాఖలు చేసిన ఫిర్యాదు కాపీని భద్రంగా ఉంచుకోవాలి. మీరు ఎల్‌పీజీ డిస్ట్రిబ్యూటర్‌కు తెలియజేసిన తర్వాత, సంబంధిత బీమా కంపెనీకి సమాచారం చేరుతుంది. ఆ ఏజెన్సీ ప్రతినిధులు వచ్చి విచారణ చేస్తారు.

పోస్ట్‌మార్టం నివేదిక తప్పనిసరి:

ప్రమాద ఘటన నిజమని నిర్ధారించిన తర్వాత, దావా ప్రక్రియ ప్రారంభమవుతుంది. పోలీసు ఫిర్యాదు కాపీ, గాయపడితే వైద్య ఖర్చుల పత్రాలు, మరణ ధృవీకరణ పత్రం లేదా మరణిస్తే పోస్ట్ మార్టం నివేదిక ఈ అన్ని పత్రాలను బీమా కంపెనీకి అందించాలి.