వైసీపీపై ఈ దుష్ప్రచారం ఎందుకంటే?

టీడీపీ ఓటమి ఖాయమనుకుంటున్న చంద్రబాబు ముందే సాకులు చెబుతున్నారని వైసీపీ నేత ఆనం రాంనారాయణరెడ్డి పేర్కొన్నారు. శుక్రవారం ఆయన వైసీపీ కార్యాలయంలో విలేఖరులతో మాట్లాడుతూ… చంద్రబాబు ఎప్పుడూ ఓటమిని అంగీకరించరని, ఎప్పుడు ఓడినా ఏదో ఓ సాకు చెప్పి తప్పుకుంటారని పేర్కొన్నారు. అందుకే ఈసారి కూడా ఓటమి ఖాయమని గ్రహించి ఎన్నికల ముందే సాకులు చెబుతున్నారన్నారు. ఈవీఎంలపై చంద్రబాబు అందుకే ఆరోపణలు చేస్తున్నారన్నారు. పైగా వైసీపీ డబ్బులు ఎక్కువ ఖర్చు పెడుతుందని, తప్పుడు ప్రచారం చేస్తున్నారని, నాలుగున్నరేళ్లుగా వేల కోట్లు దోపిడీ చేసి ఎన్నికల్లో ఖర్చు చేసేందుకు సిద్ధంగా ఉన్నది టీడీపీ కాదా అని ప్రశ్నించారు. కేవలం నంద్యాల ఉపఎన్నికల్లోనే టీడీపీ 200 కోట్లు ఖర్చు చేసిందని ఆరోపించారు. ఇవాళ, చంద్రబాబుకు ధనబలం ఉంటే, జగన్ కు జనబలం ఉందని గ్రహించాలన్నారు. వ్యవస్థలను పూర్తిగా నిర్వీర్యం చేసిన చంద్రబాబు… సర్వేల పేరుతో వైసీపీ సానుభూతిపరుల ఓటర్లను తొలగిస్తున్నారని పేర్కొన్నారు.