Fengal Cyclone : తీరం దాటే ముందు జాగ్రత్త.. అధికారులు హై అలెర్ట్

అదే సమయంలో ఆంధ్రప్రదేశ్ లోని అధికారులు కూడా అప్రమత్తమయ్యారు. పునరావాస కేంద్రాలను కూడా ఏర్పాటు చేయాలని రాష్ట్ర ప్రభుత్వం ఆదేశాలను జారీ చేసింది. కాల్ సెంటర్లను కూడా ఏపీలోని నెల్లూరు, చిత్తూరు జిల్లా కలెక్టర్ కార్యాలయాల్లో ప్రారంభించారు. తీర ప్రాంతంలో ఉన్న వారిని అప్రమత్తం చేశారు. ఎప్పుడైనా పునరావాస కేంద్రాలకు తరలి రావాల్సి ఉంటుందని చెబుతున్నారు. నాగపట్నంలోని కొడిక్కరై బీచ్ లో సముద్రం ఇప్పటికే పది మీటర్లు వెనక్కు వెళ్లడంతో మత్స్యకారులు ఆందోళన వ్యక్తం చేస్తున్నారు. మత్స్యకారులను చేపల వేటకు వెళ్లవద్దని ఇప్పటికే అధికారులు ఆదేశాలు జారీ చేశారు. ఈ నెల 29వ తేదీ వరకూ చేపల వేటపై నిషేధం విధించారు.

ఆంధ్రప్రదేశ్ లోనూ హోంమంత్రి వంగలపూడి అనిత అధికారులతో సమీక్షించారు. తుపాను ముందస్తు చర్యలకు సిద్ధంగా ఉండాలని తెలిపారు. అధికారులకు సెలవులు రద్దు చేశారు. అందరూ అందుబాటులో ఉండాలని 24 గంటలు సేవలందించేందుకు సిద్ధంగా ఉండాలని హోం మంత్రి కోరారు. మరోవైపు నదులు, వాగులు దాటేటప్పుడు తగిన జాగ్రత్తలు పాటించాలని కూడా వాతావరణ శాఖ కోరింది. దీంతో పాటు గంటకు ఎనభై కిలోమీటర్ల వేగంతో ఈదురుగాలులు వీచే అవకాశముందని, ఎవరూ చెట్ల కింద ఉండవద్దని సూచించారు. అదే సమయంలో పిడుగులు పడే అవకాశముందని కూడా చెప్పారు. ప్రజలు అప్రమత్తంగా ఉండాలని అధికారులు హెచ్చరించారు.