పొలిటికల్ పార్టీ ఇచ్చిన బిర్యానీ తిన్నారు.. వరుసగా కుప్పకూలిపోయారు
తమిళనాడులో డీఎంకే పార్టీ నిర్వహించిన కార్యక్రమంలో
తమిళనాడులో డీఎంకే పార్టీ నిర్వహించిన కార్యక్రమంలో బిర్యానీ తిని చిన్నారులు సహా 100 మందికి పైగా అస్వస్థతకు గురయ్యారు. అధికార ద్రవిడ మున్నేట్ర కజగం (డీఎంకే) శుక్రవారం నిర్వహించిన కార్యక్రమంలో బిర్యానీ తిన్న 40 మంది చిన్నారులు సహా 100 మందికి పైగా అస్వస్థతకు గురయ్యారు. పార్టీ శ్రేణులు సభ్యుల కోసం సాధారణ సమావేశం నిర్వహించి ప్రజలకు సంక్షేమ సామాగ్రి పంపిణీ చేసిన తర్వాత ఈ సంఘటన జరిగింది. హాజరైన వారికి బిర్యానీ వడ్డించారు. కొందరు ఆ బిర్యానీ పొట్లాలను తీసుకుని ఇంటికి తీసుకెళ్లారు.
బిర్యానీ తిన్న కొద్దిసేపటికే వాంతులు, వికారం వంటి లక్షణాలు కనిపించాయి. వారిని విల్లూరు ప్రాథమిక ఆరోగ్య కేంద్రానికి తరలించారు. బాధితుల సంఖ్య పెరగడంతో టెన్షన్ వాతావరణం నెలకొంది. బాధితులను విరుదునగర్, కల్లికుడిలోని ఆరోగ్య సంరక్షణ కేంద్రాలకు తరలించారు. అందరూ పాడైపోయిన ఆహారం తినడం వలన ఫుడ్ పాయిజనింగ్‌కు దారితీసిందని ఆసుపత్రి వర్గాలు సూచించాయి. ఈ ఘటనపై తిరుమంగళం పోలీసులు దర్యాప్తు ప్రారంభించారు. తదుపరి విచారణ కొనసాగుతోంది.